Кĕпер юсаççĕ, юхан шыва тасатаççĕ
Раççей Федерацийĕн Президенчĕ Владимир Путин пуçарнипе пурнăçа кĕрекен «Хăрушлăхсăр тата пахалăхлă çулсем» наци проекчĕ Элĕк муниципаллă округĕнче те ăнăçлă ĕçлет темелле. Асăннă проектпа пирĕн тăрăхра тÿрех икĕ объектра ĕçсем пыраççĕ. Мăн Вылă ял вĕçĕнчен пуçласа Хĕрлĕ Чутай муниципалитечĕн чикки таран çула тĕпренех юсама палăртаççĕ. Ку енĕпе халĕ хатĕрленÿ ĕçсем пуçланнă. Асăннă участокра çул-йĕр ĕçĕсене «Воддорстрой» тулли мар яваплă общество пурнăçлать.
Наци проекчĕпе ĕçе кĕрекен тепĕр объект вăл - Сурăмварри кĕперне юсассипе çыхăннă. Никольски - Етĕрне - Нурăс автоçул çинче вырнаçнă, Сурăм юхан шыĕ урлă выртакан кĕпере çĕнетессипе «СК» Волга» тулли мар яваплă общество ĕçлет. Çак кунсенче вырăна тухса строительство ĕçĕсемпе паллашма, ĕç-хĕле вырăнта йĕркелесе пыракан производство участокĕн начальникĕпе Владислав Лигуспа калаçма май килчĕ.
- Асăннă кĕпере 1989 çулта хута янă. Çак тапхăрта кĕперĕн хăш-пĕр пайĕсем хăйсен унчченхи çирĕплĕхне палăрмаллах çухатнă, тимĕрпе бетон пайĕ, асфальт çул япăхнă. Кĕпер айккипе тытса тухнă хÿме те паянхи нормативсемпе хăрушсăрлăхпа тивĕçтермест. Кунсăр пуçне çул çинчи шыва юхса кайма ятарлă конструкцисем пулманран шыв пухăнса тăнă, çавăнпа шăтăк-путăкланса кайнă та, - каласа парать Владислав Геннадьевич.
Тĕрĕссипе, кĕпере çĕнетес ĕç-пуç пĕлтĕр çулталăк вĕçĕнчех тытăннă. Кăçал шыв-шур типсен вăл анлă сарăлнă. Элĕк тăрăхĕнче пурăнакансемшĕн çул тĕлĕшĕнчен пысăк пĕлтерĕшлĕ пулнăран кĕпере пĕтĕмĕшле хупма çук. Çавăнпа та малтан пĕр çуррине унтан теприне юсама палăртнă.
Чи малтанах кĕпер айне тăрпа хурса, Сурăм шывне юхма «çул туса панă», юхан шыва тасатнă. Çапла майпа хăйсене кĕпере, ăна тытса тăракан конструкцие аялтан çирĕплетме условисем хатĕрленĕ. Ку енĕпе иртнĕ тапхăрта ĕçсене пурнăçланă. Çулăн пĕр çуррине япăхнă сийне сÿсе илсе, ăна çĕнĕрен сарассипе ĕçсем вĕçленсе пыраççĕ. Çавăн пекех хăрушсăрлăхпа тивĕçтерекен кĕпер айккинчи хÿмесене çĕнĕрн тăваççĕ. Çулăн пĕр çуррине туса пĕтерсен теприне юсаççĕ.
Кĕпер выртакан çырман икĕ енне те бетонласа хытараççĕ. Çул çинчи шыв юхса анма ятарлă вăлашкасем хунă. Таса мар шыв юхан шыва каймĕ тата çĕре сăрхăнса та вараламĕ. Хăрушсăрлăх йĕркисене тĕпе хурса таса мар шыв пухăнма бетон кăшăлсенчен çăл тунă. Унта вак чул тултарĕç. Çак чулсем витĕр сăрхăнса тухĕ те кĕпер çинчен анакан шыв.
«Хăрушлăхсăр тата пахалăхлă çулсем» наци проекчĕпе юсав ĕçĕсене кăçалхи ноябрь пуçламăшĕ тĕлне вĕçлеме палăртнине пĕлтерчĕ Владислав Лигус. Строительство ĕçĕсене палăртнă вăхăтра пĕтерме майсем çителĕклĕ «СК» Волга» организацин. Объектра 20 çынна яхăн тăрăшать. Çавăн пекех 10-а яхă техникăна ĕçе явăçтарнă.
Строительсен мĕнпур ĕçне ятарлă лаборатори тĕрĕслесе тăрать. Владислав Геннадьевич пĕлтернĕ тăрăх, вăл строительство материалĕсен пахалăхне, ĕçе мĕнле йĕркепе пурнăçласа пынине тĕрĕслет. Çакă ĕç пахалăхĕ çине витĕм кÿрет, кĕперпе усă курассин вăхăтне тăсать. Автотранспортпа çÿрекенсене хăрушсăрлăхпа тивĕçтерес тĕлĕшпе кĕпер çинче светофор вырнаçтарнă.
Эльвира КУЗЬМИНА.
Владимир Путин, Раççей Федерацийĕн Президенчĕ:
- Палăртнине туллин пурнăçлассишĕн кăна мар, ĕçе вăхăтра маларах тăвассишĕн те çине тăмалла. Хăрушлăхсăр паха çулсем туни промышленноçа, ял хуçалăхне, строительство тытăмне аталанма май парĕ, мĕншĕн тесен регионсем такăр та тикĕс автоçулпа çыхăнни çĕнĕ хушма инвестпроектсем пуçарма май парĕ, предпринимательсем чи малтан çавăн çине пăхаççĕ. Юлашки вăхăтра кашни çулах асăннă нацпроекта пурнăçа кĕртесси лайăх шайра пулса пынă. Малашне те пирĕн ку енĕпе рекордсене çĕнетмелле.