Сасăлавра пурин те сыхлăх йĕркисене çирĕп пăхăнмалла
Раççей Конституцине тÿрлетÿсем кĕртессипе сасăлав июлĕн 1-мĕшĕнче иртет. РФ Президенчĕ Владимир Путин ăна канмалли кун тесе палăртнипе пĕрлех çынсен сывлăхĕпе пурнăçĕ пысăк пĕлтерĕшлĕ пулнине палăртнă, çавăнпа та пĕрлехи мероприятие санитарипе эпидемиологи нормисене тĕпе хурса ирттерме чĕнсе каланă. Ку тĕлĕшпе районта сасăлав мĕнле йĕркепе иртесси çинчен Элĕк территори суйлав комиссийĕн председательне Виктор Кротова каласа пама ыйтрăмăр.
- Хальхи вăхăтра хатĕрленÿ ĕçĕсем пыраççĕ. Районĕпе сасăлав ирттерме 39 участок йĕркеленĕ, комисси членĕсене палăртнă. Паянхи куна районта сасăлава хутшăнма пултараканнисем пĕтĕмпе 13405 çын шутланаççĕ.
Сасăлав июлĕн 1-мĕшĕнче ирхи сакăр сехетре пуçланать те 20 сехетчен пырать. Апла пулин те сасăлав участокĕсем пĕр эрне маларах - июнĕн 25-мĕшĕнченех çынсене йышăнма тытăнаççĕ. Çакă коронавирус инфекцийĕ сарăлас хăрушлăх пуррине пула сасăлав ирттернĕ чухне санитарипе эпидемиологи нормисене çирĕп пăхăнса ĕçлеме тивнипе çыхăннă. Чи малтанах участоксенче сасăлама килнĕ çынсем харăсах нумаййăн пухăнса ан кайччăр тесе тăрăшатпăр. Аслă çулхисем тата сусăррисем патне килĕсене пырса сасăлаттарассине те сыхласа хăварнă. Паллах, кун пирки комиссие маларах пĕлтермелле. Тепĕр çĕнĕлĕх вăл – сасăлав кунĕччен маларах вырăнта тухса сасăлав ирттересси. Ку мелпе июнĕн 25-мĕшĕнчен тытăнса июнĕн 30-мĕшĕччен усă курма май пур. Çапла туни пĕр-пĕр ялта сасăламалли пÿлĕм çук е çынсене сасăлама пырса çÿреме транспортпа тивĕçтерме те йывăр пулсан йĕркелеме май парать.
Сасăлавра пурин те сыхлăх йĕркисене çирĕп пăхăнмаллине палăртса калас килет. Участоксенче кĕлетке температурине виçеççĕ. Кашни сасăлакана уйрăм маска, перчетке тата ручка параççĕ. Çынсем хушшинчи дистанцие те çирĕп тытса пырĕç. Кунта килекенсен çумра паспорт пулмалла, даннăйсене сасăлава хутшăнаканăн хăйĕн уçса кăтартмалла. Кун хыççăн алла пĕр бюллетень параççĕ. Сасăлама кабинăсене пĕршерĕн кĕртеççĕ. Сасăлав участокĕсене пурне те дезинфекци хатĕрĕсемпе тивĕçтеретпĕр. Алăсене çуса дезинфекци тума та уйрăм пÿлĕм уйăратпăр.
Район çыннисем хăйсен гражданла тивĕçне пурнăçласса шанас килет. Çĕршывăн Тĕп саккунне кĕртнĕ тÿрлетÿсем пирĕнтен кашнинех пырса тивнине манас марччĕ.
Новости
Прогноз погоды