«Кĕмĕл» волонтерсен пулăшăвĕ виçесĕр
Паянхи кун «кĕмĕл» волонтерсем хăйсен хастарлăхĕпе çамрăксемшĕн ырă тĕслĕх пулса тăраççĕ. Вĕсене обществăлла ĕçсенче те, спорт ăмăртăвĕсенче те, вĕренÿпе культура тытăмĕнче иртекен мероприятисенче те курма пулать.
Аслă ăрурисен хастарлăхне республикăра иртекен «Кĕмĕл чун» форум та çирĕплетет. Кăçалхипе виççĕмĕш хут пĕр лапама пухăнса Чăваш Енри «кĕмĕл» волонтерсем пĕр-пĕрин опычĕ çинчен каласа пачĕç, хăйсен ĕçĕ-хĕлĕпе паллаштарчĕç, малашнехи аталанупа çыхăннă шухăшсене сÿтсе яврĕç. Хальхи вăхăтра пирĕн регионта 1,5 пин ытла волонтер шутланать. Вĕсем çулсеренех 200 ытла ыр кăмăллăх акцийĕ ирттереççĕ, ырă ĕçсен шучĕ пилĕк пинрен те ытларах.
Октябрĕн 9-мĕшĕнче Шупашкарта иртнĕ форума Чăваш Ен Пуçлăхĕ Олег Николаев хутшăннă. Хастар та хăйсен ĕçне чунтан парăннă çынсене саламланă май «кĕмĕл» волонтерсен пуçарăвне малашне те пулăшассине пĕлтернĕ. «Сирĕн пуçарусем ял-салара, хуласенче пурăнакан çынсене кирлĕ», - тенĕ регион ертÿçи.
Республикăн тĕрлĕ муниципалитечĕсенчен килсе çитнĕ хастарсене Ĕçлев тата социаллă хÿтлĕх министрĕ Алена Елизарова саламланă. Волонтерсем ятарлă çар операцине хутшăнакан ентешсем валли гуманитари пулăшăвĕ пухаççĕ, минтерсемпе ăшă япаласем çĕлеççĕ, алсиш-нуски çыхаççĕ, хÿтĕлев çеткисем хатĕрлеççĕ. Çак ыр кăмăллăх ĕçĕсемшĕн кашниех тав сăмахне тивĕç пулнине палăртнă министр. 2024 çулхи чи хастар «кĕмĕл» волонтерсен республикăри конкурсене пĕтĕмлетсе çĕнтерÿçĕсене чысланă. Кунта вара Элĕксен хастарлăхне те палăртмалла. Ехремкассинчи Виталий Ефимов «Наставник волонтер» номинацире çĕнтерÿçĕ ятне тивĕçнĕ.
Виталий Степанович – опытлă шахматçă. Спортăн çак тĕсне çамрăксене явăçтарас тесе Ехремкассинчи библиотека çумĕнче шахмат кружокне ертсе пырать. Форум вăхăтĕнче хăйĕн волонтер ĕçĕ-хĕлĕпе паллаштарнă май кружок çинчен тĕплĕнрех каласа панă та, вĕренекенĕсен çитĕнĕвĕсем çинче те чарăнса тăнă.
Форума Элĕкри халăха социаллă пулăшу паракан центр çумĕнчи хастарсем йышлăн пухăннă. Çавăн пекех кунта Анат Татмăшри Семеновсен туслă çемйи те хутшăннă. Хальхинче Елена Леонидовнăпа Анатолий Николаевич Александр ывăлĕн çемйипе çăматă илемлетессипе ăстаçă сехечĕ ирттернĕ. Çăматă йăваласа ăна хитрелетес ĕçе кашниех хăйĕн тÿпине хывнине кăтартса панă. Кинĕ Валентина Юрьевна тата мăнукĕсем тĕрлĕ çăмран картина тăвас ăсталăха та алла илнĕ. Сăмах май, Семеновсем çулсеренех сурăхсене йышлă усраççĕ. Вĕсем çине пăхсан чăнах та çемьери йăла-йĕрке чăннипе тĕрлĕ ăру çыннисене çыхăнтарнине ăнланатăн. Çемье çулталăкĕнче çакă уйрăмах пĕлтерĕшлĕ.
М.ЛЕОНТЬЕВА.