«Салампи» авторĕ 100 çулта
Пултаруллă çынсем Элĕк енĕн пуянлăхĕ пулса тăраççĕ. Вĕсен ячĕсем ĕмĕрсем иртнĕçем çутăран та çутăрах çуталаççĕ.
Сентябрĕн 14-мĕшĕнче пирĕн паллă ентешĕмĕр – Тури Выла ялĕнче çуралса ÿснĕ Александр Спиридонович Артемьев çуралнăранпа 100 çул çитнине паллă тăватпăр. Çавăн пекех унăн «Салампи» повеçĕ пичетленнĕренпе 70 çул çитет.
Вăрçă вут-çулăмĕ витĕр тухнă мухтавлă салтака, Чăваш АССРĕн халăх писательне Александр Артемьева халалласа Элĕкри тĕп библиотекăра «Пурнăç чăнлăхĕ тата çыравçă ăсталăхĕ» литература каçĕ иртрĕ. Кунта чăваш кĕнекине кăмăлласа вулакансем – Аслă ăру шкулне çÿрекенсем пухăнчĕç. Библиотека ĕçченĕсем малтанах çыравçă кун-çулĕпе паллаштарчĕç, пултарулăх тапхăрĕсем çинче анлăн чарăнса тăчĕç. Литература каçĕнче «Ветеран» ветерансен хорĕ Александр Артемьев сăввисем тăрăх кĕвĕленĕ юрăсене шăрантарчĕç. Халăхра анлă сарăлнă «Салампи юрри», «Юрату юрри», «Ах пĕлесчĕ», «Ăшă çумăр» юррисене кăмăлласа йышăнчĕç. Кунсăр пуçне тĕлпулура юбиляр сăввисемпе повеç сыпăкĕсене илемлĕ вуланине итлесе киленме май килчĕ.
Александр Артемьев пурăннă чухне унпа тĕл пулса калаçнă самантсем паянхи кун та ентешсен асĕнче. Унăн пултарулăхне пысăка хурса хакларĕç тухса калаçакансем. Кулленхи пурнăçра ырă кăмăлĕпе уйрăлса тăнине палăртрĕç.
Александр Артемьевăн литературăри пултарулăхĕ Тăван çĕршывăн Аслă вăрçи хыççăн «Пĕчĕк Лийăн пысăк савăнăçĕ» калавран пуçланнă. Унтанпа вара 20 ытла кĕнекене вулакан патне çитернĕ. Вĕсенчен чылайăшĕ чăваш литературин ылтăн фондне кĕнĕ. «Салампи» повеçе вулакан уйрăмах ăшшăн йышăннă. Тĕрлĕ енлĕ пултаруллă ентешĕмĕр хăйне куçару ĕçĕнче те тĕрĕслесе пăхнă, критика статйисем те çырнă.
Литература каçĕнче «Пултаруллă çыравçă» кĕнеке куравĕ ĕçлерĕ. «Çутă талант» электронлă презентаци паллă ентешĕмĕр пултарулăхĕпе анлăрах паллашма май пачĕ.
Оксана БАРХАТКИНА,
библиотекарь.