«Ылтăнпа кĕмĕл» медале тивĕçнисем те пур
Килти, тĕрĕслев ĕçĕсем, Пĕрлехи патшалăх экзаменĕсем пĕтĕмпех хыçа юлнă ĕнтĕ. Паянтан вĕрентекен те урока хатĕрленсе килменнишĕн ÿпкелешмест. Куншăн савăнмалла çеç пек те. Çук, иккен, вĕренекенсен тата вĕрентекенсен чун-чĕрине те тунсăх пуснă, пурин те куçĕсем те шывланнă. Вĕсемпе пĕрлех ашшĕ-амăшĕн чĕринче те пăлхану хуçаланать. Ара, текехрен, уйрăмах вун пĕрмĕшсем, тăван шкулта партта хушшине лараймĕç. Июнĕн 28-мĕшĕнче Элĕк муниципаллă округĕнчи 11-мĕш класран вĕренсе тухакан 45 çамрăкăн ăсату каçĕ иртрĕ. Сăмах май, Элĕк вăтам шкулĕнчен 21 хĕрпе каччă, Тавăтпа Юнтапаран тăхăршар вĕренекен, Чăваш Сурăмĕнчен 6-ăн тухрĕç.
Вĕсенчен кашниех вĕренÿ учрежденийĕн историйĕнче тарăн йĕр хăварнă. Пĕрисем ăс-хакăл çивĕчлĕхĕпе палăрнă пулсан, теприсем спортра, тĕрлĕ шайри конкурссемпе олимпиадăсенче пысăк çитĕнÿсем тунă. Çавна май шкулсенче кашни вĕренекенех Тав хучĕсемпе чысланă.
Тĕрлĕ енлĕ аталаннă чи пултаруллă вĕренекенсем вара «Вĕренÿри çав тери пысăк ăнăçусемшĕн» I-мĕш тата II-мĕш степеньлĕ медальсене тивĕçнĕ. Малтанхилле каласан, «ылтăн» тата «кĕмĕл» медальсене илнĕ. Элĕк муниципаллă округĕн вĕренÿ пайĕнчен пĕлтернĕ тăрăх, çак хисепе тивĕçнисем пурĕ 10-ăн пулнă, вĕсенчен çиччĕшĕн - ылтăн, виççĕшĕн - кĕмĕл. Медале тивĕçнисем ытларахăшĕ Элĕк вăтам шкулĕнчен. Вĕсен шутĕнче Дарья Ананьева, Анна Гордеева, Анна Михайлова, Евгения Никифорова, Екатерина Никифорова, Дарья Филиппова вĕренĕве «ылтăнпа» вĕçленĕ. Асăннă вĕренÿ учрежденийĕнчи Мария Петухова, Софья Сергеева тата Фотиния Леонтьева «кĕмĕл» медаль илнĕ. Тавăт шкулĕнчи Екатерина Никифорова та вĕренÿри çитĕнÿсемшĕн тата хастарлăхшăн «Вĕренÿри çав тери пысăк ăнăçусемшĕн» 1-мĕш степеньлĕ медале тивĕçнĕ.
Тăххăрмĕш классенчен кăçал муниципалитетри шкулсенчен 157 ача вĕренсе тухнă. 16 шкул ачи экзаменсене лайăх тытса вĕренĕве «пиллĕк» паллăпа çеç вĕçленĕ. Вĕсен йышĕнче Элĕк вăтам шкулĕн сакăр вĕренекенĕ, вăл шутра - Юлия Андреева, Анастасия Константинова, Максим Сидоров, Карина Шлябина, Арина Березова, Максим Ананьев, Никита Никоноров, Татьяна Майорова. Питĕшкасси шкулĕнче пĕлÿ илнĕ Софья Васильева, Татьяна Давыдова, Виктория Яковлева, Тенири Атрур Захаровпа Тавăтри Екатерина Краснова, Вутланти Татьяна Прокопьева, Мăн Вылăри Ангелина Сорокина, Юнтапари Анна Илларионова пĕлÿ шайĕпе чи вăйлă вĕренекенсен шутне кĕнĕ.
Эльвира КУЗЬМИНА.
Новости
Прогноз погоды