Алăра – Артека каймалли путевка
Мăн Вылă шкулĕнче вĕренекен Александра Александровăпа пĕрремĕш хут «Асам» шкул театрĕсен фестивалĕнче паллашрăм. Шурă кăвакарчăн рольне калăпланă хĕрача хăйсем спектакле мĕнлерех хатĕрленни çинчен каласа панăччĕ. Ун чухнех вăл мана сăпайлăхĕпе тата хăйне евĕрлĕхпе тыткăнларĕ те. Халĕ акă эпир унпа нумаях пулмасть Атăлçи тăрăхĕнчи «Метеор» форума кайса килни çинчен калаçрăмăр.
Саша саккăрмĕш класс кăна пĕтернĕ-ха, анчах та хастарлăхĕпе чылай пысăк ĕç тума ĕлкĕрнĕ. Çавăнпа та унăн çитĕнĕвĕсене çирĕплетекен портфолио кунсерен тенĕ пекех хулăнланса пырать. Кунта Хисеп хучĕсемпе дипломсем, сертификатсем типтерлĕн упранаççĕ. Шăпах вĕсем малашлăха çул уçаканĕсем тесе каласан та йăнăш пулмĕ, мĕншĕн тесен паянхи кун республика е регион шайĕнчи мероприятисене хутшăнас тесен чи малтанах хăв чăннипех те маттур пулнине ĕнентерсе памалла. Шăпах ун чухне çак портфолио пулăшать те.
Чулхулара ирттерме палăртнă «Метеор» форум çинчен те Саша хăйĕн пекех хастар тус-юлташĕнчен пĕлнĕ. Мĕн пулать те мĕн килет тенешкел кирлĕ документсене форума валли ярса панă. Тимлесен пурте пулатех иккен! Хĕрачана Чăваш Енри ытти çамрăксемпе пĕрле форума хутшăнма йыхравланă. Чи малтанах Саша унăн калăпăшне ăнкарса та илеймен-ха. Ара кунта Атăлçи федераци округĕнчи 14 регионтан тата Раççейĕн ытти 28 регионĕнчен пĕтĕмпе 1200 хастар çамрăк пуçтарăннă. Форума йĕркелекенсем пĕлтернĕ тăрăх, конкурс çав тери пысăк пулнă – пĕр вырăншăн 10-ăн тупăшнă. Чăннипех те чи хастаррисем те телейлисем Чулхула тăрăхне пухăнма тивĕçнĕ. Вĕсен йышĕнче вара Мăн Вылă шкулĕн вĕренекенĕ Саша Александрова та.
- Форум мана пĕрремĕш куннех хăйĕн асамлăхĕпе тата мăнаçлăхĕпе тыткăнларĕ. Эпир «Пĕрремĕшсен» юхăмĕпе ĕçлерĕмĕр. Сăмах май, пирĕн ÿсĕмрисене кăçал пуçласа хутшăнтарма тытăннă. Июлĕн 4-мĕшĕнчен пуласа 9-мĕшĕччен тĕлпулусемпе ăсталăх лаççисене хутшăнтăмăр, сцена çине те тухма тиврĕ. Акă пĕчĕк çеç минтер çĕлеме хăнăхрăмăр, ăшне вырăнта çитĕнекен курăксене типĕтсе хунă. Халĕ те час-часах ăна алла илсе шăршипе киленетĕп, «Метеор» тесе çырни вара форум кунĕсене аса илтерсе ырă та ăшă туйăмсем вăратать. Форумăн юлашки кунĕ уйрăмах асра юлчĕ. Пухăннисене хальхи вăхăтра анлă сарăлнă «PIZZA» ушкăн хăйĕн концерчĕпе савăнтарчĕ. Вĕсене çывăхра курни халĕ те асран тухмасть.
- Кирек мĕнле çул çÿрев те юлташсем парнелет. Эсĕ вара пĕртте пĕр вырăнта лармастăн. Хăвăн миçе юлташ пулнине пĕлетĕн-и?
- Чăнах та, юлташсем питĕ нумай. Вĕсемпе çыхăну тытма халĕ чăрмавсем çук. Социаллă сетьсемпе мессенджерсем урлă калаçатпăр, хыпарсемпе паллаштаратпăр. Акă, Чулхулари форумра паллашнă хĕрачапа çитес вăхăтра «Артекра» пĕрле пулатпăр.
- Саша, сана Пĕтĕм Раççейри «Вектор УСпеха» конкурсра çĕнтернипе саламлатăп. Халĕ сан алăра «Артека» каймалли путевка!
- «Артека» сентябрьте каятпăр. Раççей шайĕнчи лидерсемпе пĕрле пулма май килнишĕн чăннипех савăнатăп.
- Ыйтмасăр чăтаймастăп та, «Вектор УСпеха» форума хутшăнас шухăш хăçан çуралчĕ?
- Мана хавхалантараканĕ хамăр шкулти Виктория Алвандян пулчĕ. Шăпах иртнĕ çул вăл Элĕк енри ытти хастарсемпе «Артек» Пĕтĕм тĕнчери ача-пăча центрĕнче пулчĕ. Унăн тĕслĕхĕ мана тата хăюллăрах пулма май пачĕ, - тесе пĕлтерчĕ Саша. Хăйĕн вара куçĕсем çиçеççĕ. Урăхла мĕнле пултăр-ха ĕнтĕ? Кунран-кун çĕнни патне ăнтăлать хĕрача. Акă, йăмăкĕ те ун çине пăхма тăрăшать иккен. Саша пĕлтернĕ тăрăх, час-часах хăйне конкурссене хутшăнтарма ыйтать.
Саша кăçал тăххăрмĕш класа куçнă. Класран класа «пиллĕк» паллăсемпе вĕçлесси уншăн пачах та йывăр мар. Паллах, тăрăшмасăр, вăй хумасăр пулмасть, анчах та «отличниксен» чирĕпе чирлесе кайман вăл. «Кĕçĕн классенче вĕреннĕ чухне пĕрре «тăваттă» тухнăччĕ, халĕ астумастăп та хăш предметпа пулнине», - терĕ Саша аса илме тăрăшса. Уроксене пурне те юратать пулин те обществознани предметне ыттисенчен кăмăлларах парать. Ăна тарăнрах пĕлни пулас профессие алла илме пулăшасса шанать. «Манăн юрист пулас килет, çавăнпа та тăрăшса вĕренмелле», – тет хĕрача умри тĕллевĕсемпе паллаштарса. Вĕренÿ пысăк вырăн йышăнать пулин те спорт валли те вăхăт тупать хĕрача. Ăна час-часах волейбол турнирĕсенче курма пулать. Йышра ĕçлеме пĕлнине кура шкулти волейбол командин командирне суйланă. Хăйне шаннине тÿрре кăларма пултарать вара вăл.
- Эсĕ чылай акцие хăвăр çемьене хутшăнтаратăн. Хаваспах килĕшеççĕ-и? – интересленетĕп Сашăн çывăх çыннисемпе.
- Эпĕ пĕчĕк чухне аттепе анне мана пĕрмаях мĕне те пулин хутшăнтарма тăрăшнă. Халĕ вара эпĕ вĕсене пĕр канăç та памастăп, – хуравларĕ хĕрача кăшт куларах. Чăнах та, тĕрлĕ темăпа сăн ÿкерчĕксен конкурсĕсем, акцисем – пурте туслă йышра иртеççĕ. Çакă вăл ячĕшĕн кăна мар-çке. Кирек мĕнле ĕç те пĕрлештерет те, туслаштарать те, пĕр-пĕрне хаклама та вĕрентет.
Халĕ Саша çуллахи каникулăн кашни кунĕпе туллин усă курма тăрăшать. Умра çĕнĕ вĕренÿ çулĕ кăна мар, çĕнĕ проектсемпе фестиваль-форумсем... Çĕнĕлĕх пачах та хăратмасть Мăн Вылă хĕрачине. «Малалла утăм тума хăюллăрах пулмалла, хăвна шанмалла», – тет вăл ним шик- ленмесĕрех. Апла пулсан ăнăçу сунатпăр сана, Саша!
Марина ЛЕОНТЬЕВА.