Ăшăлăх кунсерен тапса тăрать
Тараватлăх, пултарулăх, сăпайлăх - пĕтĕм паха енсем пур Тавăтри «Пучах» ача-пăча садĕнче ĕçлекен Светлана Степановăн. Вĕлле хурчĕ пек ĕçлекенскер коллективра ырă ята тивĕçнĕ. Вăл садикри пĕчĕк тусĕсене лăпкă та çепĕç сассипе, ăшă кăмăлĕпе тыткăнлать. Унăн куçĕсем çутă хĕлхем сапаççĕ тейĕн, кулли кăмăла çĕклет.
- Ачасемпе ĕçлеме интереслĕ-и? - ыйту патăм воспитателе.
- Вĕсемпе вăхăт иртнине сиссе те юлаймастăн. Мĕнле маттурсем ÿсеççĕ: куç тулли вĕт, пĕри тепринчен илемлĕрех. Пĕчĕкскерсем хăйсен тыткăнне илеççĕ. Çавăнпа та кунта ĕçленишĕн пачах та ÿкĕнместĕп, - кăмăллăн калаçрĕ Светлана Витальевна.
Вăл «Пучахра» 1994 çулхи сентябрьтен вăй хурать. Çавăнтанпа ĕç вырăнне улăштарман.
- Мĕншĕн çак профессие суйларăр? - кăсăклантăм эпĕ.
- Мана ачасемпе ĕçлеме килĕшет. Пĕчĕкскерсене питĕ юрататăп, мĕншĕн тесен вĕсемпе калаçма, хутшăнма питĕ кăмăллă. Шăпăрлансем пурте пĕр пек мар, кашни хăйне евĕр тĕнче, тавралăха та урăхларах куçпа пăхаççĕ, - терĕ воспитатель.
Уншăн кашни кун çĕнĕ пулăмсем пулса иртеççĕ. Мероприятисене вара кăсăклă тума тăрăшать.
Светлана Витальевна, Хитекушкăнь ялĕнче кун çути курнăскер, Тавăт шкулĕнче ăс пухнă. Ку вĕренÿ учрежденийĕнчен ăнăçлă вĕренсе тухсан хĕр упраç умне ыйту тухса тăнă: ăçта кайса пĕлĕве тарăнлатмалла; Анчах та уншăн кĕтмен-çĕртен Тавăтри ача садĕнче ĕç тупăннă, воспитателе пулăшаканра тимлеме тытăннă. Çамрăкшăн пĕчĕкскерсем патне туртăм кунран-кун вăйланса пынă. Садике çÿрекенсемпе пĕрле вăхăта ирттерни чун-чĕрине ăшăлăх кĕртнĕ. Шаннă ĕçе вара тĕплĕн пурнăçланă.
- Ĕçлеме пуçласан йывăрлăхсем тупăнкалатчĕç-и? - ыйтмасăр чăтаймарăм.
- Паллах, ним тума пĕлмен, тăхăнма-хывăнма, кăранташ-ручка тытма хăнăхман ачасемпе çăмăлах мар. Чăтăмлăха, яваплăха, ачашлăха мала хуни пулăшса пычĕ. Пĕр-пĕрне кĕске вăхăтра хăнăхнăран пĕр çемьери пекех пулса тăтăмăр, - хурав пачĕ Светлана Степанова.
Ачасене чун-чĕререн юратни ăна Шупашкарти педагогика училищине илсе çитернĕ. Хĕр ĕçленĕ те, çав вăхăтрах вĕреннĕ те. Педучилищăна ăнăçлă пĕтерсен пĕлĕве тарăнлатас шухăш-тĕллеве пăрахăçламан, Чăваш педагогика университетне куçăмсăр майпа вĕренме кĕнĕ. Вăхăт малаллах шунă, аслă пĕлÿ илни çинчен калакан диплома та алла тытнă. Апла пулин те Тавăтри «Пучах» ача-пăча садĕнчен уйрăлма шутламан, хăйĕн ĕç биографине кунтах малалла тăснă. Пĕчĕкскерсем вара хăйĕнчен ыррине, лайăххине кĕтнине аван туйнă.
- Шăпăрлансене пысăк тимлĕх кирлĕ. Вĕсемпе пĕрле пулнă самантра хăвăн пĕтĕм пултарулăхна уçма тивет, - пĕлтерчĕ воспитатель.
Халĕ Светлана Витальевна аслă ушкăнпа ĕçлет. Вăл каланă тăрăх, шкул çулне çитмен ачасен шухăлăхĕ пур пулин те кутăнлашмаççĕ, мĕн каланине лăпкăн итлеççĕ. Енчен те хушăва ăнăçлă пурнăçласан воспитатель вĕсене мухтаса илме те манмасть - чун ăшшине пурне те пĕр пек парать. Садикри шăпăрлансем уншăн тăван пекех. Хăй те вĕсемшĕн иккĕмĕш амăшĕ вырăннех пулса тăнă, мĕншĕн тесен кунĕпех пĕрле-çке.
Хĕрарăм ăсталăха çулсерен ÿстерсе пырать. Кăçал, акă, вăл вĕренÿ тытăмĕнчи пултарулăхпа ăс-хакăл аталанăвĕшĕн Чăваш Ен Пуçлăхĕн алă пинлĕх грантне тивĕçнĕ. Пултаруллăскер Чăваш Республикин вĕренÿ министерстви ирттернĕ конкурса хутшăннă. Июнĕн 15-мĕшĕччен вун пилĕк страницăран тăракан справка тăратнă. Унта виçĕ çулхи ĕç кăтартăвĕсене тишкерсе пĕтĕмлетнĕ. Тăрăшни сая кайман, хисепе тивĕçнĕ.
- Манăн ĕçе республика шайĕнче асăрхани питĕ савăнтарчĕ. Çавăнпа та халĕ пысăк хавхаланупа ĕçлетĕп, ачасемшĕн чунтан тăрăшатăп, - сăн-пичĕ тăруках çуталчĕ унăн.
Светлана Степанова шухăшĕпе, садикре ачасемпе ĕçлени хĕрарăма хитрелетет кăна. Вăтăр çул пĕчĕкскерсенчен уйрăлмасть, çавăнпа та опычĕ çителĕклех, паянхи кун та садике пыракансене ăшă кăмăлпа кĕтсе илет. Обществăлла ĕçе хастар хутшăнать, округ шайĕнче иртекен спорт ăмăртăвĕсенчен те пăрăнса юлмасть.
Юрий КОРНИЛОВ.