Çемье командисем тупăшрĕç
Çемье çулталăкĕнче çемьесем спорт енĕпе хăйсене тĕрĕсленинчен лайăххи мĕн пултăр ĕнтĕ. Акă, иртнĕ шăматкун Элĕкри «Хĕлхем» спорт шкулĕнче ГТО фестивалĕ иртрĕ. Кунта Чăваш Енри 11 муниципалитетран çемье командисем килсе çитрĕç. Ашшĕ-амăшĕ тата ачисемсĕр пуçне командăра аслă ăрурисен те пулмалла. Е аслашшĕ-кукашшĕ, е асламăшĕсемпе кукамăшĕсем хутшăнчĕç ăмăртусене.
Çемьесен пĕтĕмпе 9 тĕрĕслев витĕр тухмалла пулчĕ. Элĕк енрен фестивале Вонифатьевсен туслă çемйи хутшăнчĕ. Эрик Александровичпа Арина Николаевна, вĕсен Марк ывăлĕ тата Александр Владимирович аслашшĕ ГТО нормативĕсене çăмăллăнах парăнтарчĕç. Харпăр хăй кăтартăвĕ- сем тăрăх ÿсĕм категорийĕнче Марк тата Александр Владимирович спортăн темиçе тĕсĕпе те çĕнтерÿçĕ ятне тивĕçрĕç.
Çемьесем хушшинче 1-мĕш вырăна Вăрнар тăрăхĕнчи Политовсем тухрĕç. Çĕнĕ Шупашкарти Ивановсен тата Елчĕк округĕнчи Портновсен çемйисем призерсен йышне кĕчĕç. Малти вырăна тухнисем дип- ломсемпе медальсене, Кубока тата парнесене тивĕçрĕç. Парнесемпе Шупашкарти «Спорт товарĕсем» магазин тивĕçтерчĕ.
Фестивале хутшăнакансене Чăваш Енри Спорт министерствин спортпа вĕренÿ ĕçĕн массăлла спорт аталанăвĕн секторĕн заведующийĕ Наталия Салюкова тата Элĕк округĕн депутатсен Пухăвĕн депутачĕ Владислав Волков саламларĕç.
Спорт фестивалĕ Элĕк енре 2-мĕш хут иртет. Ăна йĕркелеме «Хĕлхем» спорт шкулĕнче пĕтĕм услови пур. 2022 çулта «Демографи» наци проекчĕн «Спорт – пурнăç норми» федераци проекчĕ шучĕпе ГТО нормативĕсене пурнăçлама хăтлă лапам туса панă.
Марина ЛЕОНТЬЕВА.
Новости
Прогноз погоды