Чи сыввисем элита çар чаçĕсене кайĕç
Апрелĕн 1-мĕшĕнчен çĕршывра çурхи призыв пуçланчĕ. Ку тема вара общественноç, массăллă информаци хатĕрĕсен, пулас салтаксен çемйисен тата çар ĕç комиссариачĕсен ĕçченĕсен тимлĕхĕнче темелле. Йăлана кĕнĕ тăрăх, майăн 6-мĕшĕнче, Элĕкри тĕп больницăн актсен залĕнче призыв комиссийĕ иртрĕ. Мединцина тĕрĕслевĕнче пулнă хыççăн пулас салтаксен сывлăх шайне палăртнă. Çавна май комисси йышĕнчи тĕрлĕ тытăмри специалистсен çамрăксен сывлăхне кура вĕсем мĕнле çар чаçĕсене кайма юрăхлине татса пама тиврĕ. Комисси членĕсем яш-кĕрĕмпе калаçнă май пушă вăхăтра мĕнпе кăсăкланнипе те, малашлăхра кун-çулне мĕнле профессипе çыхăнтарма шутланипе те, спорт çине епле тимлĕх уйăрнипе те интересленчĕç.
25-е яхăн çамрăка чĕнтернĕ призыв комиссине. Вĕсенчен ытларахăшĕ ятарлă професси пĕлĕвĕ паракан колледжсемпе техникумсенче ăс-хакăлне ÿстереççĕ. Çитес тапхăрта алла диплом илсе çар ретне тăма палăртаççĕ. Комиссие килнĕ яшсенчен улттăшĕ Муркаш тата Элĕк районĕсен çар ĕç комиссариачĕ урлă ДОСААФра водительте вĕренет. Çавна май çар ĕç комиссарĕ Владимир Казаков пулас салтаксене ку енĕпе те çирĕп пĕлÿ илме сĕнчĕ. Салтак атти тăхăнсан пĕр-пĕр çар транспортне «çăварлăхлама» тивнине палăртрĕ.
- Сирĕн аçăр-аннĕре пысăк тав сăмахĕ калатăп. Сире тивĕçлĕ воспитани панипе пĕрлех çан-çурăм пиçĕхлĕхĕ, сывлăх çине те пысăк тимлĕх уйăрнă. Сывлăх шайĕ «А» категориллĕ сирĕн. Эппин, элита çар чаçĕсене лекме пултаратăр. Росгварди, Сывлăшпа десант, Спецназ ГРУ çарĕсене лекес шанчăк питех те пысăк, - темиçе çамрăка та тав турĕ Владимир Иванович.
Яш-кĕрĕмрен хăшĕ-пĕри сывлăхне лайăхлатассипе сахал мар ĕçленĕ иккен. Пĕрисен кĕлетке виçи çитменрен кăкăр ачисене çитермелли апата та çинĕ. Пĕр пăхсан кулăшла пек те, анчах та тепĕр медицина тĕрĕслевĕнче тухтăрсем лару-тăру улшăннине палăртнă.
1986 çултанпа Элĕк район больницинче терапевтра, çав вăхăтранпах призыв комиссийĕнче ĕçлекен Людмила Вязанкина пĕлтернĕ тăрăх, пулас салтаксен чир-чĕрĕ нихăш çул та пĕр пек килмест иккен. Кăçалхи çуркуннехи призывра хăйсен ÿсĕмне кура кĕлетке виçи çитменнипе аптракан яш-кĕрĕм ытларах пулнă. Ура лаппин чирĕсемпе чирлекенсен шучĕ вара сахалланнă. Юлашки тапхăрта пулас çĕршыв хÿтĕлевçисем хушшинче куç чирĕсемпе аптракансен шучĕ кăштах ÿсни сисĕнет.
- Çан-çурăмран çÿллĕ, анчах та курпунланарах утакан, çинçерех, шуранка ачасем ытларах курăнаççĕ. Çакă çамрăксем уçă сывлăшра сахалтарах çÿренипе, телефонпа тата компьютер умĕнче ытларах ларнипе çыхăннă, - уçăмлатрĕ Людмила Николаевна.
Элĕк муниципаллă округĕпе кăçалхи çуркуннехи призыври пĕрремĕш салтаксем майăн 20-21-мĕшĕнче кайĕç.
Призыв комиссийĕн ĕçне пĕтĕмлетнĕ май çар ĕç комиссарĕ çурхи призывра салтак аттине тăхăнакан яш-кĕрĕм Раççей Федерацийĕн территорийĕнче вырнаçнă Хĕç-пăшаллă вăйсен чаçĕсемпе пĕрлешĕвĕсенчех службăна ирттерессине пĕлтерчĕ. Призывниксем Донецкпа Луганск Халăх Республикисене, Херсонпа Запорожье облаçĕсене çар тивĕçне пурнăçлама каймаççĕ, ятарлă çар операцине те хутшăнмаççĕ.
- 2023 çулхи апрелĕн 23-мĕшĕнче çĕршыв ертÿçи çар учетне цифровизацилесси çинчен саккуна алă пуснăччĕ. Çакă çар тивĕçне пурнăçлакансен, пурнăçланисен çар учечĕпе пĕрлехи цифра реестрне йĕркелессипе çыхăннă. Унпа килĕшÿллĕн малашне пулас салтаксем патне электрон повесткăсем яма пуçлатпăр. Асăннă çĕнĕлĕх кăçалхи кĕркуннехи призывран пурнăçа кĕме тытăнĕ. Ăнлантаратăп, электрон повесткăсене Патшалăх пулăшăвĕсен Пĕрлехи порталĕ урлă ярса парĕç. Çичĕ кун иртнĕ хыççăн ăна алла панă тесе шутланать. Хут повесткăсем çырупа янă хыççăн çитерсе панă кунран панă шутланаççĕ. Асăннă саккунпа пĕрлех штрафсен виçисем те ÿсрĕç. Ярса панă кирек епле повесткăпа та килмесен унчченхи 500 тенкĕ вырăнне 10-30 пин тенкĕ тÿлеме тивĕ. Темиçе повестка ярсан пĕринпе те килмесен 120 пин тенкĕ таран штрафлама пултараççĕ, - уçăмлатрĕ комиссар.
Сăмах май, ку призыв комиссине те килме «ерçмен» темиçе çамрăк тĕлĕшпе полици сотрудникĕсене ĕçлеме сĕнчĕ.
Эльвира КУЗЬМИНА.
Новости
Прогноз погоды