Элĕксем патшалăх пулăшăвĕн уссине туйса илнĕ
Культура учрежденийĕсене юсаса çĕнетес ыйту паян кăна çуралман. Ял çыннисем пушă вăхăтра канăва усăллă йĕркелес тĕлĕшпе ялти культура вучахĕсене хăтлăх кĕртесси çинчен пĕрре кăна мар пăшăрханса калаçнă. Вĕсен сассине илтнех! Çĕршыв шайĕнче комплекслă пулăшу парассине пăхса тухнă. Шăпах ку енĕпе «Культура» наци проекчĕ пулăшуçă пулса тăнă та.
«Культура» наци проекчĕн усси пысăк пулнине Элĕксем çирĕплетсех калама пултараççĕ. Акă виçĕ çул каялла кăна Элĕкри тĕп вулавăшран модельлĕ библиотека туса хучĕç. Халĕ хăтлă залсенче паянхи куна тивĕçтерекен компьютер техники те, арт-хула та, медиацентр тата ытти çĕнĕлĕхсем те пур. Кĕнеке фончĕ вара электронлă тата аудиокăларăмсемпе пуянланнă. Çĕнĕ ăру библио- текине хатĕрлеме федераци бюджетĕнчен пĕтĕмпе 10 миллион тенкĕ тăкакланă.
Халĕ вара Элĕкри ача-пăча ÿнер шкулĕ хăйĕн алăкĕсене уçса ярасса ачасемпе пĕрле ашшĕ-амăшĕ те кĕтет. Палăртнă тăрăх, ĕçсене октябрĕн 1-мĕшĕ тĕлне вĕçлемелле. Реконструкци планĕпе килĕшÿллĕн кунта пысăк актсен залĕ, çутă та хăтлă вĕренÿ кабинечĕсем пулĕç. Культура объектĕнчи ĕçсем мĕнлерех пынине округ администрацийĕ те, Чăваш Республикин культура министрĕ Светлана Каликова та куçран вĕçертмеççĕ. Нумаях пулмасть ĕçлĕ çул çÿревпе Элĕк тăрăхĕнче пулнă май Светлана Анатольевна объектри ĕçсемпе туллин паллашнă. «Элĕкри ача-пăча ÿнер шкулне реконструкци тăвасси «Культура» наци проекчĕн «Культура хутлăхĕ» регион проектне пула пурнăçланать. Хальхи вăхăтра кунта 337 ача вĕренет. Кунти ĕçсене тума 2023-2024 çулсенче 65,4 миллион тенкĕ уйăрнă», - тенĕ ведомство ертÿçи.
Округ центрĕнчен аякра вырнаçнă культура вучахĕсем те тимлĕхсĕр юлмаççĕ. Кăçал Юманлăхри ял клубне тата Шĕмшешри Культура çуртне тĕпрен юсаса çĕнетме тĕллев ларнă. Паяхи куна Шĕмшешсем юсав ĕçĕсене вĕçлессипе тимлеççĕ пулсан, Юманлăхсем çĕнетнĕ ял клубне паян тесен паян уçма хатĕр. Икĕ культура объектĕнчи ĕçсене пурнăçлама пĕтĕмпе 12955,07 пин тенкĕ уйăрнă. Патшалăх пулăшăвĕпе усă курса чÿречесене улăштарнă, урайа сарнă, тăрă витнĕ, алăксене улăштарнă – пĕр сăмахпа каласан шал енчен те, тулашĕнчен те хăтлăх кĕртнĕ. «Ял çыннисем чăтăмсăррăн кĕтеççĕ çĕнелнĕ клуб уçăласса. Ĕçе хăвăртлатас тĕллевпе ял хастарĕсем ниме мелĕпе пухăнса пÿлĕмсенче тирпейлерĕç, чÿречесене çуса тасатрĕç», - тесе пĕлтерчĕ Юманлăхри клуб заведующийĕ Григорий Семенов.
Ку кăна-и? Юманлăхсене савăнтаракан тепĕр хыпар та пур. Сцена çине тухмалли тум, чÿрече каррисем, офис сĕтел-пуканĕ тата музыка аппаратури ахаль те юрра-ташша хапăл Юманлăхсемшĕн чăннипех те пысăк парне вырăннех пулĕ. Округ администрацийĕнчен пĕлтернĕ тăрăх, çак тĕллевпе Юманлăхсемпе Тенисем валли 1179,9 пин тенкĕ уйăрнă.
Марина ЛЕОНТЬЕВА.
КОММЕНТАРИ
Олег НИКОЛАЕВ, Чăваш Республикин Пуçлăхĕ:
«2025 çул валли палăртнă плана иртнĕ çул кăтартăвĕсемпе пурнăçлама пултартăмăр. Федераци тата республика бюджетĕсен укçипе 6 культура çурчĕ турăмăр. 17 клуба «Пуçарулăх бюджечĕ» программăпа хута ятăмăр. 322 культурăпа кану объектне юсаса çĕнетрĕмĕр, çĕнĕ оборудованипе пуянлатрăмăр. 18 çĕнĕ ăру библиотекине ĕçлеттерсе ятăмăр. Çак ырă улшăнусене пула вулавăшсене çÿресси 40 процент ÿсрĕ. Кăçал вĕсен шучĕ 28-ра çитĕ».