Пĕрремĕш пулмалла! Пĕрле пулмалла!
Хаваслă ачасен сасси, илемлĕ юрă-кĕвĕ, хăйĕн шевлине парнелекен сарă хĕвел... Тата мĕн кирлĕ çуллахи каникул кунĕсене кĕтсе илме? Шăпах та ачасене хÿтĕлемелли кун Элĕкри Совет Союзĕн Геройĕ М.Е.Ефимов ячĕллĕ лапамра «Сывă-и, хĕвеллĕ çу кунĕсем!» уяв иртрĕ.
Уяв программи «Аслисем - ачасене» ыр кăмăллăх акцийĕнчен пуçланчĕ. Вăл «Ачалăхшăн, ачалăх ячĕпе» ыр кăмăллăх марафонĕ шучĕпе иртет. Ăна пуçарса яраканĕсем Раççей ача-пăча фончĕ, Чăваш Енри Вĕренÿ министерстви тата республикăри Хĕрарăмсен Союзĕ. Чи малтанах Элĕк округĕн пуçлăхĕн çамрăксемпе ĕçлекен советникĕ Светлана Васильева, Элĕк вăтам шкулĕн директорĕ – Элĕк муниципаллă округĕнчи депутатсен Пухăвĕн депутачĕ Владислав Волков, Чăваш Енри Хĕрарăмсен Союзĕн Элĕк округĕнчи уйрăмĕн председателĕ Ольга Алексеева кьюар-кодпа усă курса пухмăча укçа-тенкĕ хыврĕç. Ачасене вара тăрăшса вĕренме, пур ĕçре те хастар пулма сунчĕç. Çавăн пекех уява пухăннă ытти хастарсем те акцие хутшăнма кăмăл турĕç. Аса илтеретпĕр, иртнĕ çул акци вăхăтĕнче пухнă укçа-тенкĕпе çамрăк параппанçăсем валли параппансем туяннă. Халĕ вара вĕсем валли ятарлă тум çĕлеттерме палăртаççĕ. Кунсăр пуçне «Хĕлхем» спорт шкулĕнче шахмат зони валли оборудовани туянма тĕллев лартнă.
Хальхинче уява Элĕк енри 250 ытла мал ĕмĕтлĕ, хастар та пуçаруллă ачасем хутшăнчĕç. Сăлтавĕ те пур-çке – муниципалитетра кашни шкулти «Движение Первых» уйрăмсене савăнăçлă лару-тăрура уçрĕç. Ачасене çĕнĕ юхăм старт илнипе вырăнти уйрăмĕн Канашĕн председателĕ Елена Иванова саламларĕ, чи хăюллă шухăшсене пурнăçа кĕртме сунчĕ. Малалла сцена çине кашни шкул делегацийĕ тухса хăйсемпе паллаштарчĕ, яланах аталанура пулма сунса хăйсен ушкăнне йыхравларĕ. «Умра çутă та асра юлмалли самантсем кĕтеççĕ! Эпир хамăрăн пысăк та юратнă çĕршывăн пĕр пайĕ пулса тăтăмăр! Пире пĕр тĕллев пĕрлештерет - Пĕрремĕш пулмалла! Пĕрле пулмалла! Яланах хусканура пулмалла!» - терĕç вĕсем пĕр саслăн.
Элĕкри тĕп библиотека ĕçченĕсем те ачасене çак кун тĕрлĕ мероприятие хутшăнтарчĕç. Шахмат вăййи те килĕшрĕ ачасене.
М.МИХАЙЛОВА.
Новости
Прогноз погоды