Шкулсем ачасене йышăнма хатĕр
Çулла - кану кунĕпе каникул çеç мар-ха, çĕнĕ вĕренÿ çулне хатĕрленмелли хĕрÿ тапхăр та. Сентябрĕн 1-мĕшĕнче шкулсем ачасене тивĕçлипех кĕтсе илччĕр тесен вĕсене хăтлăх кĕртессипе саккунра мĕн палăртнине пĕтĕмпех пурнăçамалла, ведомствăсем хушшинчи комисси тĕрĕслевĕ витĕр тухмалла.
Июлĕн 23-мĕшĕнчен Элĕк муниципаллă округĕнче ача сачĕсем, шкулсем, хушма пĕлÿ паракан учрежденисем çĕнĕ вĕренÿ çулне хатĕррипе хатĕр маррине палăртассипе ĕçсем пуçланчĕç. Элĕк муниципаллă округĕн администрацийĕ ку тĕлĕшпе ятарлă комисси йĕркеленĕ. Комисси председателĕ муниципалитет пуçлăхĕн социаллă ыйтусемпе ĕçлекен çумĕн - вĕренÿ пайĕн начальникĕн тивĕçĕсене пурнăçлакан Людмила Ильина пулсан, асăннă йышра муниципалитет пуçлăхĕн пĕрремĕш çумĕ - территорисене хăтлăх кĕртессипе тата аталантарас енĕпе ĕçлекен Управлени начальникĕн тивĕçĕсене пурнăçлакан Олег Борисов, вĕренÿ пайĕн специалисчĕсем, шалти ĕçсен пайĕн, Вăрнарти çул-йĕр хăрушсăрлăхĕн, Наци гвардийĕн сотрудникĕсем, профком пур, пĕтĕмпе 13 çын.
Тĕрĕслевпе тухнă комиссин вĕренÿ учрежденийĕсен ĕçне тĕрлĕ енлĕ хак памалла. Террорла хăрушсăрлăхпа тивĕçтернинчен пуçласа хăтлăх кĕртессипе мĕнле ĕçлени таранах.
Кăçал комисси чи малтанах Тавăтри «Пучах» ача садне çитсе курчĕ. Кунта ĕçлекенсем тасалăхпа тирпейлĕх çине ахаль те пысăк тимлĕх уйăраççĕ. Çĕнĕ вĕренÿ çулĕ умĕн чăннипех те пысăк ĕç туса ирттернĕ. Ача-пăча лапамĕсенче тĕссĕрленнĕ кĕлеткесене, вылямалли ытти япаласене сăрласа çĕнĕ сăн кĕртнĕ. Шкул çулне çитменнисен учрежденийĕн территорийĕнче йывăç-тĕм мар, ÿссе кайнă курăка та асăрхаймăн. Тăтăшах çулса тăраççĕ. Пÿлĕмсенче хăтлă та таса. Пĕтĕмĕшле илсен, учреждени çĕнĕ вĕренÿ çулне хатĕр темелле.
Анчах та ача сачĕн заведующине Маргарита Алексеевăна пăшăрхантараканни те пур.
Ача садне пыракан çул канăç памасть ăна. Кунта асфальт е вак чул сарса хытарнă тротуар пулмалла та, сукмак пек çул илсе çитерет шĕвĕрккесемпе ашшĕ-амăшне кунта. Сукмак çул айккипе хыт-хура ÿсет. Шкул ÿсĕмне çитменнисен учрежденийĕнче ĕçлекенсем хăйсен территорийĕ çывăхĕнчи лаптăка вĕлтĕрен тата ытти курăкран çулнă пулсан, лаптăкăн тепĕр пайĕнче вара вăл темĕн çÿллĕшех-ха. Ку тĕлĕшпе ашшĕ-амăшĕ те, ача садĕнче тăрăшакансем те çул туса парас ыйтупа тухнă. Комисси членĕсене тепĕр хут аса илтерчĕ. Пăхса тухма шантарчĕç вĕсем.
Тавăт шкулĕн çуртне çеç мар, территорине те халĕ тулли кăмăлпах кĕретĕн. Йĕри-тавраллах тасалăх тыткăнлать. Иртнĕ çулсенче юсав ĕçĕсем ирттернĕ хыççăн кунта чăн-чăн илем хуçаланать. Йĕри-тавралла чечексем ÿсеççĕ, вĕренÿ çуртне пырса кĕнĕ чухне айккипе çамрăк туя йывăççисене лартнă. Пÿлĕмсенче хăтлă та таса, çутă та илемлĕ.
Ураскилт, Мăн Вылă шкулĕсен территорийĕсенчи чечексем те куçа илĕртеççĕ. Асăннă шкулсенче классенчи, коридорсенчи урайсене çĕнĕ сăн кĕртнĕ. Ураскилт шкулĕн картишĕнче унччен ватăлса кайнă улма йывăççисем территорие сăнсăрлатса ларатчĕç. Пĕлтĕрпе кăçал вĕсене пĕтĕмĕшле касса тирпейленĕ, курăка та çулнă. Ураскилт шкулĕ çĕнĕ вĕренÿ çулне хатĕр пулсан, ун çумĕнчи шкул çулне çитменнисен «Асамат кĕперĕ» ушкăнра хăш-пĕр вак-тĕвек ĕçсене пурнăçламалли пур-ха. Мăн Вылă шкулĕнче çак кунсенче спортзала çĕнĕ сăн кĕртессипе ĕçе вĕçлемелле.
Вăрнарти çул-йĕр хăрушсăрлăхĕн инспекцийĕн начальникĕн тивĕçĕсене пурнăçлакан Андрей Траков шкул ачисене турттаракан автотранспорта, çулсен схемине тĕрĕслерĕ. Пысăк çитменлĕхсемех мар пулин те, шкул директорĕсене чи малтанах огнетушительсемпе аптечкăсене çĕнетесси çине пысăк тимлĕх уйăрма сĕнчĕ. Вĕренекенсене лартса каймалли тата антарса хăвармалли лапамсене тикĕслемеллине, ятарлă паллăсем вырнаçтармаллине асăрхаттарчĕ. Кунсăр пуçне вĕренÿ учрежденийĕсен ертÿçисемпе пĕрлех муниципалитет администрацине вĕренекенсене турттармалли маршрутсем çинче, уйрăмах çул тăваткалĕсенче, ÿссе ларнă йывăç-тĕм хунавĕсене касмаллине пĕлтерчĕ. Çакăн йышши йывăçсем ÿссе ларнăран шкул автобусĕсен водителĕсем çулсем çинче ытти транспорт килнине асăрхаймаççĕ. Çакă вара инкек сăлтавĕ пулса тăма пултарать те.
Шкулсем çĕнĕ вĕренÿ çулне хатĕррине тĕрĕслеме тухнă комисси хими, биологи, физикăпа информатика пÿлĕмĕсенчи хăрушсăрлăх, столовăйсене кирлĕ оборудованипе тивĕçтерни çине пысăк тимлĕх уйăрчĕ.
Çавăн пекех пушар сигнализацийĕ мĕнле ĕçленине, саппас алăксемпе картлашкасене, документсемпе сертификатсене, пÿлĕмри çутăсене, ачасен ÿсĕмне кура парттăсемпе пукансем мĕнле тивĕçнине, класри доскасене те тĕрĕслерĕç. Вĕренÿ учрежденийĕсем ачасене кĕтсе илме хатĕр.
Эльвира КУЗЬМИНА.