Техника уя тухма хатĕр
Кашни çулах вырмана тухиччен Элĕк енри ял хуçалăх предприятийĕсемпе фермер хуçалăхĕсен комбайнсене техника тĕрĕслевĕ витĕр кăларма тивет. Кăçал та тĕрĕслев пуçланчĕ.
Акă, Элĕк округĕнчи патшалăх техника тĕрĕслевĕн ертÿçипе Александр Федоровпа Кивуйри Волков фермер хуçалăхĕнче пултăмăр. Кунта техникăна вырмана хатĕрлесси çине пысăк тимлĕх уйăрнă, икĕ комбайна та ĕçе пуçăнма хатĕрлесе çитернĕ. Сергей Петрович ертÿçĕ каланă тăрăх, тĕш тырă культурисем 753 гектар йышăнаççĕ, рапс вара 422 гектар çинчен пухса илмелле. Кăçал малтан пăрçа вырма тухасшăн.
Фермер хуçалăхĕнче инженер-механик тивĕçне пурнăçлакан Петр Вишневский хальхи йышши çĕнĕ комбайнпа уй-хирте ĕçлеме çăмăлтарах пулнине пытармарĕ. Вăйпитти арçын вырма вăхăтĕнче «уй-хир карапĕн» штурвалне алла тытать. Çапла вара хĕрÿ тапхăр вĕçлениччен те техникăран уйрăлмасть. Ĕçре хастарлăхпа палăрнăран ыттисемшĕн ырă тĕслĕх пулса тăрать.
Хăватлă тепĕр комбайна вара Анатолий Митрофанова шанса панă. Вăл та уй-хирте тăрăшулăх кăтартасшăн.
- Вырма ĕçĕсем кăлтăксăр иртчĕр. Ĕçленĕ чухне пурин те яваплăха туймалла. Хуçалăх пысăк тăкак ан тÿстĕр тесен комбайна яланах юсавлă тытмалла, кабинăра аптечка, огнетушитель пулмалла, - ăнлантарчĕ А.Федоров комбайнерсемпе вĕсен пулăшаканĕсене. - Паллах, ĕçре асăрхануллă пулмалла. Хăрушсăрлăх техникине пăхăнмалла, сывлăха упрамалла.
Вăл хальхи вăхăтра техника пĕлтерĕшĕ пысăк пулнине палăртрĕ. «Уй-хир карапĕ» юсавлă пулсан тăкакĕ те сахалтарах, ĕç тухăçĕ те аванрах пулĕ.
- Эпир çулсерен тенĕ пекех хальхи йышши техника туянма тăрăшатпăр. Йывăр çĕр ĕçне тимĕр те чăтаймасть теççĕ те, çĕнĕ пулин те ăна юсамалли тупăнкалать, - пĕлтерчĕ С.Волков фермер. Ертÿçĕ комбайнерсемпе механизаторсен ĕçĕпе кăмăллă. Уншăн тăрăшуллисене хавхалантарасси малти вырăнта тăрать. Çавăнпа кунта ĕçне кура шалу та лайăх тÿлеççĕ. Уйăхра икĕ хутчен параççĕ.
Çав кун «Новый путь» ял хуçалăх предприятине те çитрĕмĕр. Пире Генрих Романов инженер ăшă кăмăлпа кĕтсе илчĕ. Комбайнерсемпе паллаштарчĕ, вырмана хатĕрленсе техникăна тепĕр хут пăхса тухнине каларĕ. Элĕк енри патшалăх техника тĕрĕслевĕн ертÿçи Александр Федоров кашни комбайна тĕплĕ тĕрĕслерĕ, анчах кăлтăксемех тупаймарĕ.
- «Уй-хир карапĕсем» шанчăклă алăра пулни лайăх палăрать, - мухтаса илмесĕр чăтаймарĕ Александр Ксенофонтович.
- Хуçалăхра вырмана виçĕ комбайн хутшăнĕ. Вĕсем уя тухма хатĕр. Çунтармалли-сĕрмелли материалсем çителĕклĕ кÿрсе килнĕ. Çавăнпа та уйри пурлăха пĕр тăкаксăр пухса кĕртес тĕллевпе пурăнатпăр халĕ эпир, - терĕ Генрих Георгиевич. Çамрăк кунĕпех машинăпа трактор паркĕнчен уйрăлмасть. Пĕр-пĕр техника арканчĕ-и - саппас пайĕсене тупса килесишĕн çийĕнчех çула тухать. Ялан ĕçшĕн çунаканскершĕн ĕççи вăхăтĕнче яваплăх татах та ÿсет. Вăл вара нимĕнле йывăрлăхран хăрамасăр куллен малалла талпăнать.
Çакна каламалла, Элĕк округĕнче 25 комбайна шута илнĕ. Вĕсем пурте тенĕ пекех уя тухма хатĕр. Акă, Чăрăшкассинчи Николай Денисов çамрăк фермер уй-хирти тырра вырма тытăннă та ĕнтĕ.
Юрий Корнилов.