Выльăх-чĕрлĕхе юратнăран
Питĕшкассинчи Георгий Павлов ачаран выльăх-чĕрлĕхе юратнă, ĕçе кăмăлланă. Мĕн хушнă - çавна пурнăçланă. Ашшĕ-амăшне пулăшассине тĕп тивĕç тесе шутланă. Шкул хыççăн Хусанти ветеринари институтĕнче ветеринара вĕренсе тухнă. Дипломлă специалист тăван тăрăха каялла таврăннă та хуçалăха ĕçе вырнаçнă. Уншăн фермăри выльăх-чĕрлĕхе сыватасси тĕп тивĕç пулса тăнă. Хальхи вăхăтра Элĕк райповĕн ветеринари аптекин заведующийĕнче тимлет.
Ку яваплă ĕçре вăл çирĕм икĕ çул тăрăшать, çавна май килти чĕр чунсене сывă пулма пулăшать, вĕсен хуçисене - телейлĕ. Георгий Петрович кирек кама та ялан вашават кĕтсе илет, вĕсемпе ăшшăн калаçать, ырă сĕнÿ-канаш та пама пултарать. Тепри, акă, эмел курупки çине çырнă инструкцие вуласа тухсан та ăнланмасть. Ветеринари аптекин заведующийĕ вара хăй алла тытать те, унта мĕн çырнине тавар туянакана каласа парать. Кунта, паллах, ветеринари пĕлĕвĕ те пулмалла. Вăл, ку енĕпе ятарласа вĕреннĕскер, выльăх-чĕрлĕх чирĕпе çыхăннă ыйтăвăн хуравне çийĕнчех тупма пултарать. Хăйĕн ĕçне юратаканскере çынсемпе ĕçлеме килĕшнине пытармасть, вĕсене май пур таран пулăшма пултарнишĕн чунтан савăнать. Çак ырă пахалăх çынсемпе ĕçленĕ чух малти вырăнта тăмалла тесе шутлать.
Райпон ветаптекинче выльăх апачĕпе пĕрлех витамин хутăшĕсене те туянма пулать. Çу кунĕсенче, акă, килти хушма хуçалăхри ĕнесем улăх-çаранлă вырăнта çÿренĕ май тĕрлĕ чир çаклатма пултараççĕ. Выльăх-чĕрлĕхе сыватма мĕн кирлине йăлтах тупса пама пултарать - эмел çителĕклех. Çук пулсан саккас парать. Вăхăт нумаях та иртмест, килсе те параççĕ. Кунта çавăн пекех зоотаварсем те вырăн тупнă, выльăха валли комбикорм та çителĕклех. Унăн хакĕ вара, тавара тÿрремĕн илсе килнĕрен, йÿнелнĕ. Çавăнпа выльăх апатне туянакансен хисепĕ ÿснĕ.
Элĕкри ветеринари аптекин заведующийĕ Георгий Павлов ветеринар профессине чун хушнипе, кăмăл туртнипе суйласа илнĕ. Ахальтен мар халĕ хăйне шанса панă ĕçе юратса пурнăçлать. Ырă кăмăлĕпе палăрать. Çавăнпа ветаптекăран çын кунĕпе те татăлмасть. Георгий Петрович юратнă ĕçе куллен тулли кăмăлпа килет. Опыт пуртан йывăрлăхсене çăмăллăн çĕнтерет.
Вăл, Элĕк райповĕн ветеринари аптекин заведующийĕнче тимлекенскер, çынна ырă тăвассине тĕпе хурать. Ĕç хыççăнхи пушă вăхăта та усăллă ирттерме пĕлет. Элĕкри халăх театрĕнче вылять, çавăн пекех вырăнти культура çурчĕн сцени çине те тухать, пултарулăха аталантарать.
Юрий КОРНИЛОВ.
Новости
Прогноз погоды