Хĕрарăм пурнăç парнелет... Унран пахи мĕн пултăр?
«Пĕрремĕш хут варта ача хăйĕн пĕчĕк çеç урисемпе тапкалашнине, кăкăр ĕмĕртнине, малтанхи утăмсем тунине - çак нимĕн-пе танлаштарайми туйăмсене амăшĕ кăна туйма пултарать. Çут çанталăк панă ăна çакна. Анчах та, шел пулин те, амăшĕн туйăмне кашни хăрарăмах туйса илме пултараймасть е тăрăшмасть те. Манăн ачасăр хĕрарăма алăсăр çынпа танлаштарас килет. Пĕр ача – пĕр алă, икĕ е унран та ытларах – тепĕр алли. Телейĕ те çавăн чухлех!» - терĕ Ураскилт чиркĕвĕн настоятелĕ Александр Егоров протоиерей. Çак сăмахсене илтекенĕсем – хăйне евĕр питех те çамрăк уява – Ача амăшĕ пулма хатĕрленекенсен уявне пухăннисем пулчĕç.
Çамрăк уява халалланă мероприяти Элĕкри тĕп больницăра иртрĕ. Кунта хĕрарăмсен консультацинче учетра тăракан пулас амăшĕсене йыхравланă. Вĕсене саламлама Элĕк муниципаллă округ пуçлăхĕн çумĕн тивĕçĕсене пурнăçлакан Людмила Ильина, Элĕк больницин тĕп врачĕ Татьяна Федорова, Ураскилт чиркĕвĕн настоятелĕ Александр Егоров протоиерей, «Чувашия-Мед» страхлав компанийĕн ертсе пыракан специалисчĕ Алина Кавказова, Елена Трифонова врач-гинеколог килсе çитрĕç.
Пирĕн çĕршывра çие юлнă хĕрарăмсен ячĕпе йĕркеленĕ уява çулталăкне икĕ хутчен ирттереççĕ. Пĕрремĕшĕ çут çанталăк чĕрĕлнĕ вăхăтра – апрелĕн 7-мĕшĕнче тата октябрĕн 7-мĕшĕнче. Ку ĕнтĕ çимĕç пухса илмелли вăхăт тенине пĕлтерет. Кăçал вара Раççейре Çемье çулталăкне халалланă май уявăн пĕлтерĕшĕ татах та анлăланать. Ватăсем авалах: «Ача-пăча пÿрт тултарать», – тенĕ. Кил илемне вĕсем пысăк йышлă ача-пăчара курни иккĕлентермест.
Уяв историйĕпе Елена Прохоровна врач-гинеколог кĕскен паллаштарчĕ. Икĕ çул каялла «Единая Россия» партин «Çирĕп çемье» проектпа килĕшÿллĕн пуçласа Çие юлнисен кунне акци мелĕпе йĕркеленĕ. Ăна Раççейĕн 16 регионĕнче ирттернĕ. Пĕлтĕртенпе вара ăна пĕтĕм Раççей шайĕпе йĕркелеме йышăнннă. Çак кунсенче ача амăшĕ пулма хатĕрленекен хĕрарăмсем консультацисемпе ăстаçă сехечĕсенче пулса кураççĕ, акцисене хутшăнаççĕ.
Пухăннисене Людмила Михайловна Элĕк округĕн пуçлăхĕ Александр Терентьев ячĕпе тата хăйĕн ячĕпе саламласа çирĕп сывлăх сунчĕ, ачасен пуласлăхĕ çутă та манăçми пултăр терĕ. Хальхи вăхăтра Раççей тата Чăваш Республикин правительстви шайĕнче амăшлĕх тата ачалăх ыйтăвĕсем çине пысăк тимлĕх уйăрнине палăртса каларĕ. Татьяна Юрьевна тĕп врач та хĕрарăмсене саламланă май çак тĕлĕнмелле асамлă, çав вăхăтрах яваплă тапхăрпа туллин киленсе пурăнма сунчĕ. Акцин тĕп лозунгне аса илтерсе ача кĕтмелли тапхăр пĕрре кăна мар, темиçе те пултăр терĕ. Лозунгĕ вара çапларах: «Ача кĕтмелли тапхăр ун патне тепĕр хут таврăнас килмелле туйăмпа ирттĕр!» Элĕк енре демографи лару-тăрăвĕ ырă енне улшăнасса кашниех кĕтетпĕр-çке.
Ертсе пыракан специалист Алина Николаевна вара «Чувашия-Мед» страхлав компанийĕ яланах пулăшу пама хатĕррине пĕлтерсе сĕнÿсен буклетне валеçсе пачĕ. Çак кун мероприятие пухăннисем асăнмалăх парнесене те тивĕçрĕç.
Район больницинчен пĕлтернĕ тăрăх, паянхи кун хĕрарăмсен консультацийĕнче 28-ăн учетра тăраççĕ. Кăçал октябрĕн 1-мĕшĕ тĕлне вара округра 22 ача çуралнине регистрациленĕ.
М.МИХАЙЛОВА.
Новости
Прогноз погоды