Ялсенче чи маттуррисем те хастаррисем пурăнаççĕ
«Ялта чи лайăххисем» слет Тăвай тăрăхĕнчи «Упа кĕтесĕ» кану базинче виççĕмĕш хут иртрĕ. Унта республикăн пур округĕнчен те ял хуçалăхĕнче, вĕрентÿре, культурăра, сывлăх сыхлавĕнче, муниципалитетпа влаç тытăмĕнче тăрăшакан 1 пин ытла çамрăк хутшăнчĕ. Вĕсен йышĕнче Элĕксем те пулчĕç.
«Слет тĕллевĕ - ялти çамрăксене пĕр лаптăка пухса вĕсен шухăш-кăмăлне ыйтса пĕлесси, проектсене пурнăçа кĕртме май туса парасси», - палăртрĕ ЧР ял хуçалăх министрĕ Сергей Артамонов уявпа саламланă май. Агрослет çултан-çул аталанать, унта хутшăнакансен йышĕ ÿссе пырать. Кунта яш-кĕрĕмпе хĕр-упраç валли программа пуян йĕкеленĕ: уçă калаçусем, çавра сĕтелсем, ăсталăх класĕсем, спартакиада, культура мероприятийĕсем. Кун йышши тĕлпулусенче çамрăксем хăйсен пуçарулăхне кăтартаççĕ, пĕр-пĕрин опычĕпе паллашаççĕ. Слета палатка лагерĕн формачĕпе йĕркеленĕ. Ку проект «Единая Россия» партин «Раççей ялĕ» проекчĕ пулăшнипе пурнăçланать.
Слетра 5 дискусси лапамĕ ĕçленĕ: «Агротуризм», «Кадрсем», «Патшалăх ĕçĕ», «Çемье» тата «Экологи». Унта экспертсем, Чăваш Ен Правительствин ĕçченĕсем, округ пуçлăхĕсем çамрăксемпе хутшăнчĕç, ыйтусене хуравларĕç.
Агрослет ĕçне Чăваш Ен Пуçлăхĕ Олег Николаев хутшăннă, кăçал агромаркет уçасси пирки пĕлтернĕ. Çакă ял хуçалăх продукцийĕпе суту-илÿ тумалли лаптăк пулĕ. Чăн та, агрослет Чăваш Енре туризма ăнăçлă аталантармалли вырăн пулса тăнă.
Çавăн пекех «Ялта чи лайăххисем» агрослетăн ĕçлĕ программи шайĕнче Раççейри ял çамрăкĕсен союзĕн регионти уйрăмĕ тата Раççей ял хуçалăх банкĕн Чăваш Енри филиалĕ тачă çыхăнса ĕçлесси пирки килĕшÿ çирĕплетнĕ. Унпа килĕшÿллĕн çамрăксен политикине пурнăçлама, çĕнĕ ăрăвăн социаллă пурнăçĕнчи, пултарулăхри тата предпринимательлĕхри пуçарăвĕсене пулăшу кÿме, ял территорийĕсене аталантарма тĕллев лартнă.
Кăçалхи агрослет чылайăшĕн асĕнче юлĕ, уйрăмах - Даниил Кирилловпа Виктория Матвеевăшăн. Тăвай каччи пикене пурин умĕнче те мăшăрĕ пулма ыйтнă. Çамрăксем «ВКонтакте» социаллă сетьре паллашнă. Вĕсене Чăваш Ен Пуçлăхĕ Олег Николаев саламланă.
Вĕренÿ программисĕр пуçне муниципалитет командисен хушшинче спартакиада иртнĕ. Командăсем 7 дисциплинăра тупăшнă: кире пуканĕ йăтассинче, вĕрен туртассинче, волейболла выляссинче, турист çул-йĕрне тухассинче, спорт çемйисен тупăшăвĕнче тата квадроциклсемпе çÿрессинче. Элĕк çамрăкĕсем спортăн пур тĕсĕнче те хастар хутшăннă. Спорт çемйисем хушшинче иртекен ăмăртусенче Элĕк салинчи Вонифатьевсем палăрнă. Эрик Александровичпа Арина Николаевна тата Марк ывăлĕ ГТО нормативĕсене пурнăçлассипе тупăшнă, дартс пенĕ тата эстафета чупнă. Эстафета чупассипе шăпах та вĕсем призерсен йышне кĕрсе 3-мĕш вырăн йышăннă.
Уçă сывлăшра техĕмлĕ апат хатĕрленинчен ырри мĕн пур-ши? Акă пулă шÿрпи пĕçерессипе те тупăшаççĕ агрослета хутшăнакансем. Элĕксем хамăр тăрăхри юхан шывсенчен тытнă пулăсенчен хатĕрленĕ тутлă апата. Пуллине хăш юхан шывпа пĕверен тытнине видеопрезентаципе кăтартса пынă, çапла вара хăнасене Элĕк тăрăхĕнчи юхан шывсемпе те паллаштарнă.
Н.СМИРНОВА.
Новости
Прогноз погоды