Юманлăхсен - савăнăç: ял клубĕ çĕнелчĕ
Ял çыннине пĕр çĕре пухаканĕ - культура çурчĕ. Акă, Юманлăх ял клубĕ çумĕнче юрă-ташă ушкăнĕ те, театр коллективĕ те пур. Ял çыннисем вара хăйсен чун туртăмĕпе репетицисене хутшăнаççĕ. Анчах та вĕсене клуб çурчĕ кивелни канăçсăрлантарнă. Ĕмĕтленни, тахçанах кĕтни тинех пурнăçланчĕ - кăçал строительсем çурт тăррине кăна мар, шалти залпа сценăна та, çавăн пекех пÿлĕмсене те çĕнетрĕç. Иртнĕ эрнекун вара Юманлăхра ял клубĕн алăкĕ тĕпрен юсанă хыççăн çĕнĕрен савăнăçлă лару- тăрура уçăлчĕ.
Ял-йыш чылаййăн пухăннă. Сумлă хăнасене Юманлăхсем çăкăр-тăварпа тата юрă-ташăпа кĕтсе илчĕç. Акă, вĕсем хĕрлĕ хăйăва касрĕç те шала иртрĕç. Çутă та илемлĕ зал тÿрех хăйĕн ытамне илчĕ. Кунта вара малтанах вырăнти ал ăстисен ĕçĕсемпе паллашрĕç - курав кашнин кăмăлне кайрĕ. Çакна каламалла, культура учрежденине кунта килекеншĕн хăтлă тунă: сцена та, курмалли зал та илемленнĕ. Пĕр сăмахпа, юсав ĕçне сахал мар туса ирттернĕ.
Савăнăçлă мероприятие Чăваш Республикин культура министрĕн çумĕ – организациллĕ ĕç пайĕн начальникĕ Надежда Павлова, Элĕк муниципалитет округĕн пуçлăхĕн çумĕн тивĕçĕсене пурнăçлакан - вĕренÿ пайĕн начальникĕ Людмила Ильина, округ администрацийĕн культурăпа архив ĕçĕсен секторĕн заведующийĕ Людмила Семенова хутшăнчĕç.
Чи малтанах Шупашкартан килнĕ хăна сăмах илчĕ. «Паян Юманлăхсен пултарулăхне чунтан пăхса савăнтăм. Вĕсем юрра-ташша ăста пулни питĕ лайăх палăрчĕ. Клуб çĕнелнĕ хыççăн кунти коллектив çĕнĕрен те çĕнĕ ÿсĕмсем тăвасси, сцена çинче вара яланах сăвă-кĕвĕ, ташă-юрă янăрасси пирки иккĕленместĕп», - терĕ Надежда Ивановна. Вăл хальхи вăхăтра патшалăх культура учрежденисен пурлăхпа техника никĕсне çирĕплетме укçа-тенкĕ сахал мар уйăрнине каларĕ.
«Çĕнелнĕ клуб ялсемпе çывăхри ялсенче пурăнакансене пĕр çĕре пухакан центр тата пĕр-пĕринпе тĕл пулмалли вырăн пултăр. Кунта тĕрлĕ çулсенчи çынсем пĕрле пуçтарăнса пушă вăхăта ялан усăллă ирттерччĕр. Сире округ пуçлăхĕн ячĕпе пысăк пулăмпа ăшшăн саламлатăп», - çапларах каларĕ Людмила Михайловна.
Округ администрацийĕн культурăпа архив ĕçĕсен секторĕн заведующийĕ Людмила Семенова Элĕк тăрăхĕ пултаруллă çынсемпе пуян пулнине палăртрĕ. Элĕкри культура çурчĕн директорĕ Иван Никифоров Юманлăхсене сывлăх, ăнăçу тата пултарулăхра пысăк çитĕнÿсем сунчĕ, парне пачĕ.
«Пирĕн ял клубĕ - ял пурнăçĕн тĕп пайĕ, мĕншĕн тесен унта тĕрлĕ çулсенчи çынсем пуçтарăнаççĕ. Халĕ кунта юсав ĕçĕсем иртнĕ хыççăн условисем татах та лайăхланчĕç. Строительсем тăрăшса ĕçленĕрен ĕç пахалăхлă та хăвăрт пулчĕ. Вун-вун çул юсаман çурта йĕркене кĕртнĕшĕн чун савăнать», - терĕ ял клубĕн заведующийĕ Григорий Семенов.
Уяв вăхăтĕнче ял çыннисен шухăш-кăмăлне ыйтса пĕлтĕмĕр. Акă, ял старости Реомир Быков ялти клуб тĕрлĕ ăрушăн культура пурнăçĕн чĕри шутланнине пĕлтерчĕ. Вырăнти культура ĕç-хĕлне ăнăçлă йĕркелесе пыракан мăшăра кăмăлтан ырларĕ. Семеновсем тăрăшнипе ялта тĕрлĕ мероприяти час-часах иртет. Юманлăхри Зоя Никандрова вара пултаруллă коллектив малалла талпăннине, ăнтăлупа пурăннине палăртрĕ. Вăл хăй те яланах сцена çине тухать, тĕрлĕ юрă юрлать.
Юманлăхсем халăх умне çĕнĕ сцена костюмĕсемпе тухрĕç. Вĕсем шăрантаракан юрăсем кураканăн чунне тыткăнларĕç. Çавăн пекех тĕрлĕ ялтан килсе çитнĕ пултарулăх ушкăнĕсем хăйсен ăсталăхне кăтартрĕç. Артистсене залра ларакансем ăшшăн йышăнчĕç, вĕсен пултарулăхне тивĕçлипе хакларĕç.
Мĕнех, «Культура» наци проекчĕ хальхи вăхăтри тата халиччен курман çĕнĕ çул-йĕр уçать. Ăна пурнăçлани кивĕ культура учрежденийĕсене чĕртсе тăратать, ялсенче пурăнакансене çĕнĕ пурнăç сывлăшĕ парать. Культура çурчĕ вăл ял çыннисен пушă вăхăтне усăллă ирттермелли, çавăн пекех тĕрлĕ уявсем йĕркелемелли вырăн та пулса тăрать.
Çакна каламалла, Юманлăх ял клубне 1991 çулта кирпĕчрен çĕклесе лартнă. Кăçалхи çул ăна модернизацилеме - пурлăхпа техника никĕсне пуянлатма патшалăх хыснинчен 5049084,78 тенкĕ уйăрнă. Юманлăх ял клубне халĕ Юманлăхра тата Качалавра пурăнакансем пырса çÿреççĕ.
Юрий КОРНИЛОВ.